တ႐ုတ္ႏိုင္ငံ သုေတသန ေရခဲျပင္ခြဲသေဘၤာ Xuelong 2 အႏၲာတိတ္ေဒသ စူးစမ္း ေလ့လာေရး ခရီးစဥ္ၿပီးစီး

တရုတ်နိုင်ငံ၏ သုတေသန ရေခဲပြင်ခွဲသင်္ဘော Xuelong 2 သို့မဟုတ် နှင်းနဂါး ၂ သည် နိုင်ငံ၏ ၃၇ ကြိမ်မြောက် အန္တာတိတ်ဒေသ စူးစမ်းလေ့လာရေးခရီးစဉ်အား မေ ၇ ရက်တွင် အဆုံးသတ်ခဲ့ပြီး ရှန်ဟိုင်းမြို့ရှိ မိခင်ဆိပ်ကမ်းသို့ ပြန်လည်ရောက်ရှိလာခဲ့ကြောင်း သိရသည်။

Xuelong 2 သည် သိပ္ပံပညာရပ်ဆိုင်ရာ စူးစမ်းလေ့လာရေးခရီးကို ၂၀၂၀ ပြည့်နှစ် နိုဝင်ဘာ ၁၀ ရက်က ရှန်ဟိုင်းမှ စတင်ခဲ့ခြင်းဖြစ်ပြီး ရက်ပေါင်း ၁၇၉ ရက်အတွင်း ရေမိုင် ၃၆,၀၀၀ ကျော် ခရီးနှင်ခဲ့ခြင်း ဖြစ်သည်။

အဆိုပါ သင်္ဘောသည် ယင်းဒေသအတွင်းရှိ တရုတ်နိုင်ငံ၏ Zhongshan စခန်းနှင့် Great Wall စခန်းထံ ထောက်ပံ့ရေးနှင့် အလှည့်ကျဝန်ထမ်းများအား သယ်ဆောင်ပေးခဲ့ခြင်းဖြစ်သည်။ ပင်လယ်ရေကြောင်း ဂေဟစနစ်နှင့် သဘာဝပတ်ဝန်းကျင် စုံစမ်းစစ်ဆေးမှုများကိုလည်း ခရီးစဉ်အတွင်း စူးစမ်းလေ့လာရေး၏ တစ်စိတ်တစ်ပိုင်းအဖြစ် ဆောင်ရွက်ခဲ့ကြောင်း သိရသည်။

၎င်းအဖွဲ့သည် နိုင်ငံတကာ အန္တာတိတ်ဒေသ စူးစမ်းလေ့လာရေးအဖွဲ့ဝင်များအတွက် ကယ်ဆယ်ရေးလုပ်ငန်းများအား အောင်မြင်စွာ ဆောင်ရွက်ခဲ့သလို အန္တာတိတ်ဒေသ စူးစမ်းလေ့လာရေးခရီး ပစ္စည်းထောက်ပံ့မှု၌ နိုင်ငံတကာပူးပေါင်းဆောင်ရွက်မှုအား ရှေ့ဆက်တိုးနိုင်ခဲ့သည်။ COVID-19 ၏ စမ်းသပ်မှုကိုလည်း ကြံ့ကြံ့ခံနိုင်ခဲ့ပြီး အဖွဲ့ဝင်များအကြား ရောဂါကူးစက်မှု လုံးဝမရှိခဲ့ကြောင်း သိရသည်။

ယခုခရီးစဉ်သည် Xuelong 2 ၏ အန္တာတိတ်ဒေသတစ်ခွင် သင်္ဘောတစ်စင်းတည်းဖြင့် စူးစမ်းလေ့လာခြင်းကို ပြီးစီးအောင် ပထမဆုံး ဆောင်ရွက်နိုင်ခဲ့ခြင်းလည်း ဖြစ်သည်။

တရုတ်နိုင်ငံက တည်ဆောက်ထားသော ဝင်ရိုးစွန်းဒေသ ရေခဲပြင်ခွဲသင်္ဘောနှင့် သိပ္ပံပညာရပ်ဆိုင်ရာ သုတေသနသင်္ဘော Xuelong 2 သည် အရှည် ၁၂၂.၅ မီတာနှင့် အကျယ် ၂၂.၃၂ မီတာရှိကာ သင်္ဘော၏ ဝမ်းပမာဏနှင့် ညီမျှသော ရေထု၏အလေးချိန် ၁၃,၉၉၆ တန် ရှိကြောင်းသိရသည်။ အဆိုပါ သင်္ဘောသည် အမြန်နှုန်း ရေမိုင် ၂ မိုင် (၃.၇၀ kph) မှ ရေမိုင် ၃ မိုင် (၅.၅၆ kph) ဖြင့် ၁.၅ မီတာရှိသော ရေခဲထုကို အဆက်မပြတ်ထိုးခွဲနိုင်ကြောင်း သိရသည်။

Xuelong 2 သည် အဆိုပါ စူးစမ်းလေ့လာမှုမစတင်မီ ၂၀၁၉ ခုနှစ် ဇူလိုင်လ၌ တည်ဆောက်ပြီးချိန်မှစ၍ တောင်ဝင်ရိုးစွန်းနှင့် မြောက်ဝင်ရိုးစွန်းအထိ မစ်ရှင်ကို ပြီးစီးခဲ့ကြောင်း သိရသည်။ (Xinhua)