တရုတ်နိုင်ငံက မေလတွင် 5G ဖုန်း ၁၇ ဒသမ ၇၄ သန်း တင်ပို့

တရုတ်နိုင်ငံ အရှေ့ပိုင်း ရှန်ဟိုင်းမြို့ရှိ အားကစားပန်းခြံတစ်ခု၌ AI ခွဲခြမ်းစိတ်ဖြာမှုအတွက် ဖုန်းဖြင့် မှတ်တမ်းတင်ထားသည့် မြင်ကွင်းတစ်ခုအား ၂၀၂၁ ခုနှစ် မေ ၃၀ ရက်တွင် တွေ့ရစဉ်(ဆင်ဟွာ)

တရုတ်နိုင်ငံရှိ 5G ဖုန်း တင်ပို့မှုများသည် ယခုနှစ် မေလတွင် အလုံးရေ ၁၇ ဒသမ ၇၄ သန်းအထိ ရှိပြီး နှစ်အလိုက် ၆ ရာခိုင်နှုန်း မြင့်တက်ခဲ့ကြောင်း တရုတ်နိုင်ငံ သတင်းအချက်အလက် နှင့် ဆက်သွယ်ရေး နည်းပညာအကယ်ဒမီ(CAICT)၏ အချက်အလက်များတွင် ဖော်ပြထားသည်။ယင်းပမာဏသည် မေလအတွင်း နိုင်ငံ၏ စုစုပေါင်း မိုဘိုင်းလ်ဖုန်းတင်ပို့မှုများ၏ ၈၅ ဒသမ ၃ ရာခိုင်နှုန်း ရှိကြောင်း စက်မှု နှင့် သတင်းအချက်အလက်နည်းပညာဝန်ကြီးဌာန လက်အောက်ရှိ သုတေသနအဖွဲ့အစည်းတစ်ခု ဖြစ်သည့် CAICT က ပြောကြားခဲ့သည်။

ယခုနှစ် ပထမငါးလတာအတွင်း တရုတ်နိုင်ငံ၏ မိုဘိုင်းလ်ဖုန်းတင်ပို့မှုများသည် အလုံးရေ ၁၀၈ သန်းအထိရှိပြီး နှစ်အလိုက် ၂၇ ဒသမ ၁ ရာခိုင်နှုန်း ကျဆင်းခဲ့ကြောင်း ၊ အလုံးရေ ၁၀၈ သန်းအနက် ၇၉ ဒသမ ၇ ရာခိုင်နှုန်းမှာ 5G ဖုန်းများ ဖြစ်ကြောင်း သိရသည်။

တရုတ်နိုင်ငံသည် ဇန်နဝါရီလမှ မေလအထိကာလအတွင်း စမတ်ဖုန်း ၁၀၆ သန်း တင်ပို့ခဲ့ပြီး ပထမငါးလတာအတွင်း စုစုပေါင်းမိုဘိုင်းလ်ဖုန်းတင်ပို့မှုများ၏ ၉၈ ဒသမ ၂ ရာခိုင်နှုန်း ရှိကြောင်း သိရသည်။

ယင်းငါးလတာအတွင်း ပြည်တွင်းအမှတ်တံဆိပ်များသည် တရုတ်မိုဘိုင်းလ်ဖုန်းဈေးကွက်၏ အကြီးဆုံးအစိတ်အပိုင်းကို ရယူခဲ့ပြီး ပြည်တွင်းအမှတ်တံဆိပ်များသည် စုစုပေါင်း ပြည်တွင်းမိုဘိုင်းလ်ဖုန်းတင်ပို့မှုများ၏ ၈၃ ဒသမ ၈ ရာခိုင်နှုန်းအား ပံ့ပိုးပေးခဲ့ကြောင်း သိရသည်။ (Xinhua)