အမေရိကန်နိုင်ငံရေးသမားအချို့က “တရုတ်ကြောက်ရောဂါ” ရနေကြောင်း ကျောက်လိကျန်း ပြောကြား

အမေရိကန် နိုင်ငံရေးသမားအချို့က “တရုတ်ကြောက်ရောဂါ” ၊ “ညှင်းပန်းခံရမည်ဟူသော စိုးရိမ်မှုလွန်ကဲသောရောဂါ” ရနေပြီး ရောဂါလက္ခဏာကလည်း မသေးငယ်လှကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောက်လိကျန်းက ဇူလိုင် ၂၇ ရက်တွင် ပြောကြားခဲ့သည်။

ယင်းနေ့တွင်ကျင်းပသည့် ပုံမှန်သတင်းစာရှင်းလင်းပွဲတွင် သတင်းထောက်တစ်ဦးက “အမေရိကန် အထက်လွှတ်တော် အမိမြေလုံခြုံရေးနှင့်အစိုးရရေးရာကော်မတီ ရီပက်ဘလစ်ကန်ပါတီဝင်အချို့၏ စစ်တမ်းအစီရင်ခံစာတွင် တရုတ်သည် Federal Reserve မှာ သတင်းပေးကွန်ရက်ထူထောင်ရန် ကြိုးပမ်းကြောင်း၊ Federal Reserve ဝန်ထမ်းများက တရုတ်လူရည်ချွန်အလုပ်ခေါ်စာစီမံကိန်းနှင့်သက်ဆိုင်သည့်စာချုပ်လက်ခံရရှိပြီး အမေရိကန် စီးပွားရေး၊ အတိုးနှုန်းအပြောင်းအလဲနှင့် မူဝါဒအချက်အလက်များကို ပံ့ပိုးပေးရန် တောင်းဆိုခံရကြောင်း ဖော်ပြထားပါတယ်။ ထို့အပေါ် ဘယ်လိုမှတ်ချက်ပြုချင်ပါသလဲ”ဟု မေးမြန်းခဲ့ခြင်းဖြစ်သည်။

ထိုသို့မေးမြန်ချက်အပေါ် ကျောက်လိကျန်းက အထက်ပါအတိုင်း မှတ်ချက်ပြုပြောကြားခဲ့ခြင်း ဖြစ်သည်။

အစီရင်ခံစာဟု ဆိုရာတွင် လူနည်းစု ရီပက်ဘလစ်ကန်လွှတ်တော်အမတ်များက အဖျက်သဘောဖြင့် နိုင်ငံရေးမုသာဝါဒကို ဖန်တီးခြင်း ဖြစ်ပြီး အခြေအမြစ် အလျဉ်းမရှိဟု ကျောက်လိကျန်းက ဆိုသည်။
အမေရိကန် နိုင်ငံရေးသမားအချို့က “တရုတ်ကြောက်ရောဂါ” ၊ “ညှင်းပန်းခံရမည်ဟူသော စိုးရိမ်မှုလွန်ကဲသောရောဂါ” ရနေပြီး ရောဂါလက္ခဏာကလည်း မသေးငယ်လှကြောင်း၊ အမေရိကန် Federal Reserve ဘက်ကလည်း သက်ဆိုင်ရာ လွှတ်တော်အမတ်များကို ယင်းအစီရင်ခံစာနှင့်စပ်လျဉ်း၍ မကျေနပ်မှုနှင့် သံသယဖြစ်မှုများကို စာလွှာပေးပို့ထားပြီးဖြစ်သည်ကို သိရကြောင်း၊ ၎င်းမှာ ယင်းအစီရင်ခံ၏ အနက်အဓိပ္ပါယ်ကို ဖော်ပြပြီး ဖြစ်ကြောင်း ကျောက်လိကျန်းက ထည့်သွင်းပြောကြားခဲ့သည်။ (Xinhua)