တရုတ်ဈေးကွက်သို့ အာဖရိက၏ အရည်အသွေးကောင်းမွန်သော လယ်ယာထွက်ကုန်ပစ္စည်းများ ဝင်ရောက်နိုင်ရေး အားပေးသွားမည်ဟု တရုတ်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် ပြောကြား - 新闻

တရုတ်နိုင်ငံအစိုးရက တရုတ်-အာဖရိက လယ်ယာကဏ္ဍပူးပေါင်းဆောင်ရွက်မှုကို အလေးထားရာ အာဖရိက လယ်ယာထွက်ကုန် တင်သွင်းမှုကို တက်ကြွစွာ တွန်းအားပေးဆောင်ရွက်ခဲ့ကြောင်း တရုတ်နိုင်ငံခြားရေးဝန်ကြီးဌာန ပြောခွင့်ရ ပုဂ္ဂိုလ် ဝမ်ဝန်ပင်းက ဩဂုတ် ၁၆ ရက်တွင် ပြောကြားခဲ့သည်။ယင်းနေ့တွင် ကျင်းပသော ပုံမှန်သတင်းစာရှင်းလင်းပွဲတွင် သတင်းထောက်တစ်ဦးက “မကြာသေးမီက ကင်ညာနိုင်ငံရဲ့ ထောပတ်သီးတွေ တရုတ်နိုင်ငံကို တင်သွင်းလို့ရသွားတယ်။ ဒီအပေါ် အများက လိုလိုလားလားကြိုဆိုကြတယ်။ အာဖရိကဘက်ကလည်း လယ်ယာထွက်ကုန်ပစ္စည်းတွေ ပိုမိုများပြားစွာ တရုတ်ဈေးကွက်ထဲ ဝင်ရောက်နိုင်ဖို့ မျှော်လင့်ကြတယ်။ ဒီအပေါ် တရုတ်ဘက်က ဘယ်လို ဆောင်ရွက်မှုတွေ ရှိပါသလဲ။ ဒါ့အပြင် တရုတ်-အာဖရိက ပူးပေါင်းဆောင်ရွက်မှု ဖိုရမ် ၈ ကြိမ်မြောက် ဝန်ကြီးအဆင့်အစည်းအဝေးမှာ တရုတ်ဘက်က အာဖရိက လယ်ယာထွက်ကုန်ပစ္စည်းတွေ တရုတ်နိုင်ငံကို တင်သွင်းဖို့ အစိမ်းရောင်လမ်းကြောင်း ဖွင့်လှစ်လိုက်တယ်လို့ ကြေညာခဲ့တာကို ကျွန်တော်တို့ သတိထားမိပါတယ်။ ဒီအခြေအနေနဲ့ပတ်သတ်လို့ နောက်တစ်ဆင့် မိတ်ဆက်ပြောကြားပေးလို့ရမလား”ဟု မေးမြန်ခဲ့ခြင်း ဖြစ်သည်။

ထိုမေးမြန်းမှုအပေါ် ဝမ်ဝန်ပင်းက တရုတ်နိုင်ငံအစိုးရသည် တရုတ်-အာဖရိက လယ်ယာကဏ္ဍပူးပေါင်းဆောင်ရွက်မှုကို အလေးထားရာ အာဖရိကလယ်ယာထုတ်ကုန် တင်သွင်းရေးအတွက် တက်ကြွစွာ တွန်းအားပေး ဆောင်ရွက်ခဲ့ကြောင်း ပြောကြားခဲ့သည်။ ၂၀၁၈ ခုနှစ် တရုတ်-အာဖရိက ပူးပေါင်းဆောင်ရွက်မှု ဖိုရမ် ပေကျင်း ထိပ်သီးအစည်းအဝေး ကျင်းပသည့်အချိန်မှစပြီး ကင်ညာ၊ တောင်အာဖရိက၊ ဘီနင်၊ အီဂျစ် စသည့် အာဖရိက နိုင်ငံ ၁၄ နိုင်ငံ၏ လယ်ယာထွက်ကုန် စားသောက်ကုန်ပစ္စည်းများက တရုတ်နိုင်ငံသို့ ဝင်ရောက်ခဲ့ကြောင်း ၊ တရုတ်နိုင်ငံသည် အာဖရိက လယ်ယာထွက်ကုန်ပစ္စည်း တင်ပို့သည် ဒုတိယအကြီးဆုံးနိုင်ငံဖြစ်ရာ ယခုနှစ်များတွင် အာဖရိကမှ တရုတ်နိုင်ငံသို့ တင်ပို့သော လယ်ယာထွက်ကုန်ပစ္စည်းသည် နှစ်စဉ် ပျမ်းမျှ ၁၁.၄ ရာခိုင်နှုန်း တိုးတက်လာခဲ့ကြောင်း ၊ ၂၀၂၁ ခုနှစ်တွင် အာဖရိက၏ တရုတ်နိုင်ငံသို့ လယ်ယာထွက်ကုန်ပစ္စည်းတင်ပို့မှုပမာဏသည် ကာလတူထက် ၁၈.၂ ရာခိုင်နှုန်း တိုးလာခဲ့ကြောင်း ပြောကြားခဲ့သည်။

ပြီးခဲ့သည့်နှစ် နိုဝင်ဘာလတွင် ကျင်းပသော တရုတ်-အာဖရိက ပူးပေါင်းဆောင်ရွက်မှုဖိုရမ် ၈ ကြိမ်မြောက် ဝန်ကြီးအဆင့်အစည်းအဝေးတွင် တရုတ်နိုင်ငံက အာဖရိကလယ်ယာထွက်ကုန်ပစ္စည်းများများအတွက် အစိမ်းရောင်လမ်းကြောင်းဖွင့်လှစ်သည်ဟု ကြေညာခဲ့ကြောင်း ဝမ်ဝန်ပင်းက ပြောကြားခဲ့သည်။ ထို့အပေါ် တရုတ်နိုင်ငံ အကောက်အခွန်အထွေထွေအုပ်ချုပ်ရေးအဖွဲ့ကလည်း လက်တွေ့ကျ ဖော်ဆောင်နိုင်မည့် တင်သွင်းရေးဆိုင်ရာ အဆင်ပြေလွယ်ကူစေသော နည်းလမ်းများကို သတ်မှတ်ခဲ့ပါကြောင်း၊ ပထမအနေဖြင့် အာဖရိကနိုင်ငံများက အဆိုပြုသော လယ်ယာထွက်ကုန်ပစ္စည်း တင်သွင်းရန်လျှောက်ထားမှုကို ဦးစားအပေးအနေဖြင့် ထည့်သွင်းစဉ်စားကာ သက်ဆိုင်ရာနည်းပညာအချက်အလက်များ၌ ထည့်သွင်းပြီး အန္တရာယ်သုံးသပ်မှုများကို ချက်ချင်း စတင်ကာ ရောဂါစစ်ဆေးမှုလုပ်ငန်းဆောင်တာများကို လျင်မြန်စွာ တွန်းအားပေး လုပ်ဆောင်ခြင်း၊ ဒုတိယအနေဖြင့် နိုင်ငံတူ၊ အလားတူစီမံထားသော လယ်ယာထွက်ကုန်ပစ္စည်းများ သို့မဟုတ် နိုင်ငံမတူ အမျိုးအစားတူ လယ်ယာထွက်ကုန်ပစ္စည်းများကို အန္တရာယ်ထိန်းချုပ်နိုင်မှုအခြေအနေတွင် တစ်ပေါင်းတည်းသုံးသပ်မှုများလုပ်ဆောင်ကာ တင်သွင်းရေးလုပ်ငန်းဆောင်တာများ လျင်မြန်စေရန် လုပ်ဆောင်ခြင်း ၊ တတိယအနေဖြင့် အာဖရိကနိုင်ငံများတွင် တင်သွင်းခွင့်ရပြီးသော လယ်ယာထွက်ကုန်ပစ္စည်းများ၏ လုပ်ငန်းများ မှတ်ပုံတင်မှုအဆင်ပြေလွယ်ကူစေရေး ဗွီဒီယိုဖြင့် စစ်ဆေးခြင်း သို့မဟုတ် စာရွက်စာတမ်း စစ်ဆေးခြင်းသည့် အဆင်ပြေလွယ်ကူစေသောနည်းလမ်းများကို အသုံးပြု၍ သုံးသပ်မှုနှင့်မှတ်ပုံတင်မှုလုပ်ငန်း လျင်မြန်စွာ ဆောင်ရွက်နိုင်ရေး စသည်တို့ကို လုပ်ဆောင်ထားကြောင်း ပြောကြားခဲ့သည်။

“တရုတ်နိုင်ငံသက်ဆိုင်ရာဌာန တွေကလည်း တရုတ်-အာဖရိက ကျန်းမာရေးနှင့်ဇီဝကမ္မဗေဒဆိုင်ရာ ပူးပေါင်းဆောင်ရွက်ရေးဖိုရမ် ကျင်းပမှာဖြစ်ပြီး အရည်အသွေးကောင်းမွန်တဲ့ အာဖရိက ဒေသထွက် လယ်ယာထုတ်ကုန်ပစ္စည်းတွေ ပိုမိုများပြားစွာ တရုတ်ဈေးကွက်ကို အဆင်ပြေချောမွေ့ဝင်ရောက်နိုင်ရန် အားပေးသွားမှာ ဖြစ်ပါတယ်”ဟု ၎င်းက ပြောကြားခဲ့သည်။

“နှစ်ဘက်စလုံးရဲ့ အတူတကွ ကြိုးပမ်းမှုမှာ တရုတ်-အာဖရိက လယ်ယာထွက်ကုန် စားသောက်ကုန်ပစ္စည်း ကုန်သွယ်ရေးပိုပြီး စည်ပင်ဝပြောလာမယ် ၊ တရုတ်-အာဖရိက ပြည်သူတွေအတွက် ပိုမိုလက်တွေ့ကျတဲ့အကျိုးစီးပွားတွေ ရရှိလာမယ်လို့ ကျွန်တော်တို့ ယုံကြည်ပါတယ်”ဟု ဝမ်ဝန်ပင်းက ပြောကြားခဲ့သည်။ （Xinhua）