တရုတ်-တောင်ကိုးရီးယား သံတမန်ဆက်ဆံရေးထူထောင်ခြင်း နှစ် ၃၀ ပြည့် အခမ်းအနားသို့ ဝမ်ရိ တက်ရောက်
တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး ဝမ်ရိက သြဂုတ် ၂၄ ရက်တွင် ပေကျင်း၌ ကျင်းပသော တရုတ်-တောင်ကိုးရီးယား သံတမန်ဆက်ဆံရေးထူထောင်ခြင်း နှစ် ၃၀ ပြည့် အခမ်းအနားသို့ တက်ရောက်စဉ် (ဆင်ဟွာ)
တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး ဝမ်ရိက သြဂုတ် ၂၄ ရက်တွင် ပေကျင်း၌ ကျင်းပသော တရုတ်-တောင်ကိုးရီးယား သံတမန်ဆက်ဆံရေးထူထောင်ခြင်း နှစ် ၃၀ ပြည့် အခမ်းအနားသို့ တက်ရောက်ပြီး တရုတ်နိုင်ငံ သမ္မတ ရှီကျင့်ဖိန်မှ တောင်ကိုရီးယားနိုင်ငံ သမ္မတ ယွန်းဆက်ယိုသို့ ပေးပို့ခဲ့သည့် အထိမ်းအမှတ် ဂုဏ်ပြုသဝဏ်လွှာကို ဖတ်ကြားကာ မိန့်ခွန်းပြောကြားခဲ့သည်။ ထို့နောက် တရုတ်နိုင်ငံဆိုင်ရာ တောင်ကိုရီးယားသံအမတ်ကြီး Chung Jae-ho က သမ္မတ ယွန်းဆက်ယိုမှ တရုတ်နိုင်ငံ သမ္မတ ရှီကျင့်ဖိန်သို့ ပေးပို့ခဲ့သည့် အထိမ်းအမှတ် ဂုဏ်ပြုသဝဏ်လွှာကို ဖတ်ကြားခဲ့ပြီး မိန့်ခွန့်ပြောကြားခဲ့ကြောင်း သိရသည်။
သမ္မတ ရှီကျင့်ဖိန်က တရုတ်-တောင်ကိုးရီးယား နှစ်နိုင်ငံ နှစ် ၃၀ ဆက်ဆံရေး ဖွံ့ဖြိုးတိုးတက်မှု ရလဒ်ကို ပြန်လည်သုံးသပ်ခဲ့ပြီး အမြော်အမြင်ကြီးမားမှု၊ အပြန်အလှန်လေးစား ယုံကြည်မှု၊ ပူးပေါင်းဆောင်ရွက်မှုဖြင့် ဘုံအကျိုးဖြစ်ထွန်းမှု၊ ပွင့်လင်းပြီး အများပါဝင်နိုင်မှုဟူသော တန်ဖိုးရှိသည့် အတွေ့အကြုံ ၄ ရပ်က တရုတ်-တောင်ကိုးရီးယား ဆက်ဆံရေး ရေရှည်ဖွံ့ဖြိုးတိုးတက်မှုအတွက် အခြေခံ လမ်းညွှန်ချက်များ ပံ့ပိုးပေးနိုင်ခဲ့ရာ ခေတ်ကာလအတွက် အလွန်အရေးကြီးသော အနက်အဓိပ္ပာယ်ရှိကြောင်း ဂုဏ်ပြုသဝဏ်လွှာအတွင်း အကျဉ်းချုပ်ထည့်သွင်းပြောကြားခဲ့ကြောင်း ဝမ်ရိကဆိုသည်။
လက်ရှိ ကမ္ဘာကြီးသည် နှစ်တစ်ရာအတွင်း မကြုံဖူးသော အပြောင်းအလဲများနှင့် ဆင့်ကဲပြောင်းလဲဖြစ်ပေါ်နေရာ တရုတ်-တောင်ကိုးရီးယား နှစ်နိုင်ငံသည် ယခင်ထက်မက လက်ရှိပစ္စုပ္ပန်၊ နောင်အနာဂတ်တွင် အိမ်နီးချင်းကောင်း၊ မိတ်ဆွေကောင်းနှင့် မိတ်ဖက်ကောင်းများ ဖြစ်သင့်ပြီး မူလရည်မှန်းရာဆန္ဒကို အမြဲလိုက်နာကာ အပြန်အလှန်လေးစား ယုံကြည်ရန်၊ အပြန်အလှန် ချိတ်ဆက်ပေါင်းစည်း၍ ဖွံ့ဖြိုးတိုးတက်မှုကို အတူကြံဆရန်၊ အချင်းချင်းနားလည်မှုဖြင့် ရင်းနှီးစွာ လက်တွဲဆောင်ရွက်ရန်၊ တရားမျှတမှုကို အမြဲအခိုင်အမာလိုက်နာပြီး ငြိမ်းချမ်းရေးကို အတူတကွ မြှင့်တင်ရမည်ဖြစ်ကြောင်း ဝမ်ရိက ထောက်ပြခဲ့သည်။
တောင်ကိုးရီးယားနိုင်ငံ အစိုးရသစ်သည် အပြန်အလှန်လေးစားသော စိတ်ဓာတ်ကို အခြေခံ၍ နှစ်နိုင်ငံမဟာဗျူဟာမြောက် ပူးပေါင်းဆောင်ရွက်မှု မိတ်ဖက်ဆက်ဆံရေးကို ဆက်လက်နက်ရှိုင်းစွာ ဆောင်ရွက်ကာ နှစ်ဘက်ဘုံအကျိုးဖြစ်ထွန်းမှုကို တိုးချဲ့သွားမည် ဖြစ်ကြောင်း၊ သံတမန်ဆက်ဆံရေး ပူးတွဲကြေညာချက်ပါ အခြေခံမူဖြင့် မိတ်ဖက်ပူးပေါင်းဆောင်ရွက်ရေးခေတ်ကာလသစ်ကို ဖွင့်လှစ်သွားမည်ဖြစ်ကြောင်း Chung Jae-ho က ဆိုသည်။
ထိုနေ့တွင် ဝမ်ရိနှင့် တောင်ကိုရီးယား နိုင်ငံခြားရေးဝန်ကြီး Park Jin တို့က ပေကျင်းမြို့နှင့် ဆိုးလ်မြို့ အသီးသီးတွင် “တရုတ်-တောင်ကိုရီးယား ဆက်ဆံရေးဆိုင်ရာ အနာဂတ် ဖွံ့ဖြိုးတိုးတက်ရေး ကော်မတီ” ပူးတွဲအစီရင်ခံစာ တင်သွင်းခြင်း အခမ်းအနားသို့ တက်ရောက်၍ မိန့်ခွန်းပြောကြားခဲ့ကြောင်း သိရသည်။ (Xinhua)