ကျောက်ဖြူရေနက်ဆိပ်ကမ်းစီမံကိန်းပတ်ဝန်းကျင်နှင့် လူမှုရေးသက်ရောက်မှုဆန်းစစ်ခြင်းဆိုင်ရာ အများပြည်သူနှင့်တွေ့ဆုံဆွေးနွေးပွဲ ကျင်းပ - 新闻

ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်း၏ ပတ်ဝန်းကျင်နှင့် လူမှုရေးသက်ရောက်မှု ဆန်းစစ်ခြင်းဆိုင်ရာနယ်ပယ်အတိုင်းအတာ သတ်မှတ်ခြင်းအဆင့် အများပြည်သူနှင့်တွေ့ဆုံဆွေးနွေးပွဲကို ဩဂုတ် ၂၇ ရက်မှ ၂၈ ရက်အထိ ကျင်းပခဲ့ကြောင်း သိရသည်။ အဆိုပါတွေ့ဆုံဆွေးနွေးပွဲတွင် စီမံကိန်းအချက်အလက်များ၊ နောက်ဆုံးတိုးတက်မှုအခြေအနေများကို အများပြည်သူအား မိတ်ဆက်ပြောကြားခဲ့သလို ပြည်သူလူထု၏တောင်းဆိုချက်နှင့်အကြံပြုချက်များကို နားထောင်ခဲ့ကြောင်း သိရသည်။ကျောက်ဖြူရေနက်ဆိပ်ကမ်းစီမံကိန်း ပတ်ဝန်းကျင်နှင့် လူမှုရေးသက်ရောက်မှု ဆန်းစစ်ခြင်းဆိုင်ရာ နယ်ပယ်အတိုင်းအတာ သတ်မှတ်ခြင်းအဆင့် မြေပြင်လုပ်ငန်းများ စတင်နေပြီဖြစ်ကြောင်း သိရသည်။ မြန်မာနိုင်ငံ၏ ပတ်ဝန်းကျင်သက်ရောက်မှု ဆန်းစစ်ခြင်းဆိုင်ရာ လုပ်ထုံးလုပ်နည်းများ၏ သက်ဆိုင်ရာ သတ်မှတ်ချက်များအရ CITIC Consortium မှ တတိယအဖွဲ့အစည်းဖြစ်သည့် ESIA အေဂျင်စီ Myanmar Survey Research (MSR) ကို ဖိတ်ခေါ်၍ ယခုအကြိမ် အများပြည်သူနှင့်တွေ့ဆုံဆွေးနွေးပွဲအား ပြုလုပ်ခဲ့ခြင်း ဖြစ်ကြောင်း သိရသည်။

ပတ်ဝန်းကျင်နှင့် လူမှုရေးသက်ရောက်မှု ဆန်းစစ်ခြင်းဆိုင်ရာ နယ်ပယ်အတိုင်းအတာ သတ်မှတ်ခြင်းအဆင့် အများပြည်သူနှင့် တွေ့ဆုံဆွေးနွေးခြင်းသည် ESIA လုပ်ငန်းစဉ်တွင် အရေးကြီးသည့် ကွင်းဆက်ဖြစ်ရာ အဓိကရည်ရွယ်ချက်မှာ သက်ဆိုင်သူတို့အား စီမံကိန်း၏အသေးစိတ် အခြေအနေကို မိတ်ဆက်ပြောကြားရန်၊ မျှော်မှန်းထားသည့် အဓိကသက်ရောက်မှုများကို အတည်ပြုရန်နှင့် သက်ဆိုင်သူတို့၏မေးခွန်းနှင့်အကြံပြုချက် စသည့်တို့ကို စုဆောင်း မှတ်တမ်းတင်ရန် ဖြစ်ကြောင်း သိရသည်။ ထိုမှရရှိလာသော အခြေခံအချက်အလက်များနှင့်ရလဒ်များကို ရှေ့ဆက်လုပ်ဆောင်ရမည့် ESIA စုံစမ်းစစ်ဆေးခြင်းအဆင့်အတွက် အရေးကြီးအထောက်အထားများအဖြစ် ထားရှိမည်ဖြစ်ကြောင်း သိရသည်။

ပထမအကြိမ် အများပြည်သူနှင့် တွေ့ဆုံဆွေးနွေးပွဲကို ဩဂုတ် ၂၇ ရက်က ကျောက်ဖြူဟိုတယ်၌ ကျင်းပခဲ့သည်။ အဆိုပါတွေ့ဆုံဆွေးနွေးပွဲကို ကျောက်ဖြူအထူးစီးပွားရေးဇုန်စီမံခန့်ခွဲမှုကော်မတီ အတွင်းရေးမှူး နှင့်အဖွဲ့ဝင်များ၊ CITIC Myanmar ဒုတိယမန်နေးဂျင်းဒါရိုက်တာ စွန်းထျယ်ကျွင်းနှင့်အဖွဲ့ဝင်များ၊ ကျောက်ဖြူခရိုင်၊ မြို့နယ်အစိုးရကိုယ်စားလှယ်များ၊ ဒေသခံနာမည်ကျော် စာရေးဆရာများ၊ လူမှုအဖွဲ့အစည်းများ၊ ကျောက်ဖြူမြို့နယ်ဒေသခံများနှင့် အနီးတစ်ဝိုက် ကျေးရွာများမှ ကိုယ်စားလှယ်များ စသည်ဖြင့် လူပေါင်း ၁၀၀ နီးပါး တက်ရောက်ခဲ့ကြကြောင်း သိရသည်။ ဒုတိယအကြိမ် အများပြည်သူနှင့်တွေ့ဆုံဆွေးနွေးပွဲကို ဩဂုတ် ၂၈ ရက်က မဒေးကျွန်း ဘုန်းတော်ကြီးကျောင်းတွင် ကျင်းပခဲ့ရာ နယ်ပယ်အသီးသီးက ကိုယ်စားလှယ် ၁၂၀ ခန့် ပါဝင် တက်ရောက်ခဲ့ကြကြောင်း သိရသည်။

ကျောက်ဖြူအထူးစီးပွားရေးဇုန်စီမံခန့်ခွဲမှုကော်မတီ အတွင်းရေးမှူးက ရေနက်ဆိပ်ကမ်းစီမံကိန်း တင်ဒါခေါ်ခြင်းမှ လက်ရှိ ESIA လုပ်ငန်းစဉ်များအထိ လုပ်ငန်းတစ်ရပ်လုံးအား မိတ်ဆက်ပြောကြားခဲ့သည်။

ထို့နောက် CITIC Myanmar ဒုတိယမန်နေးဂျင်းဒါရိုက်တာ စွန်းထျယ်ကျွင်းက ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်းသည် လက်ရှိ ကျောက်ဖြူ၌ ကြုံတွေ့နေရသည့် စီးပွားရေး ဖွံ့ဖြိုးတိုးတက်မှုအခက်အခဲကို ဖြေရှင်းမည့်အကြောင်းအရာများနှင့် ကျောက်ဖြူ ဒေသခံပြည်သူများနှင့် နောင်မျိုးဆက်များအတွက် အကျိုးဆောင်ကြဉ်းပေးသွားမည့်အကြောင်းအရာများအား မိတ်ဆက်ပြောကြားခဲ့သည်။ ထို့အတူ CITIC Consortium အနေဖြင့် ရေနက်ဆိပ်ကမ်းစီမံကိန်း ESIA လုပ်ငန်းကို အထူးအလေးထားကြောင်း၊ ပတ်ဝန်းကျင်နှင့် လူမှုရေးသက်ရောက်မှု ဆန်းစစ်ခြင်းအတွက် နိုင်ငံတကာတင်ဒါရွေးချယ်မှုဖြင့် Myanmar Survey Research (MSR) ကို ရွေးချယ်ခဲ့သလို နိုင်ငံတကာ နာမည်ကျော် အင်ဂျင်နီယာစီမံခန့်ခွဲမှုအတိုင်ပင်ခံကုမ္ပဏီဖြစ်သည့် HATCH ကို စီမံခန့်ခွဲမှုအတိုင်ပင်ခံအဖြစ် ဖိတ်ခေါ်ခန့်အပ်ခဲ့ပြီး မြန်မာနိုင်ငံ၏ ပတ်ဝန်းကျင်ထိန်းသိမ်းရေးဥပဒေများ၊ နိုင်ငံတကာလုပ်ထုံးလုပ်နည်းများနှင့်အညီ စည်းကမ်းတင်းကျပ်စွာဖြင့် ESIA နှင့် စီမံကိန်းကာလပြည့် ပတ်ဝန်းကျင်ထိန်းသိမ်းရေးလုပ်ငန်းများကို ကောင်းမွန်စွာ လုပ်ဆောင်သွားမည်ဖြစ်ရာ ကျောက်ဖြူရေနက်ဆိပ်ကမ်းကို ပတ်ဝန်းကျင်ဖြင့် လိုက်ဖက်ညီသော၊ ရေရှည်တည်တံ့ခိုင်မြဲပြီး ဟန်ချက်ညီသောခေတ်မီဆိပ်ကမ်းဖြစ်အောင် အားထားဖော်ဆောင်သွားမည် ဖြစ်ကြောင်း၊ လက်ရှိ ဆောင်ရွက်နေသော ESIA လုပ်ငန်းစဉ်များတွင် ကျောက်ဖြူနှင့်မဒေးကျွန်း ကျေးရွာအသီးသီးက ကျေးရွာသူ/ကျေးရွာသားများ ပါဝင်အားပေးကူညီဆောင်ရွက်ကြပါရန် ပြောကြားခဲ့သည်။

CITIC Myanmar ကိုယ်စားလှယ်နှင့် MSR ကိုယ်စားလှယ်တို့မှ ရေနက်ဆိပ်ကမ်းစီမံကိန်း၏ နောက်ခံအကြောင်းအရာ၊ ပထဝီအနေအထား၊ စီမံကိန်းဖွံ့ဖြိုးတိုးတက်ရေး လုပ်ငန်းစဉ်၊ အယူအဆ၊ ဒေသခံများအတွက်ဆောင်ကြဉ်းပေးမည့် အကျိုးစီးပွားနှင့် ESIA လုပ်ငန်းစဉ်အကြောင်းအရာများ ၊ အများပြည်သူ၏ ပါဝင်ပုံ စသည်တို့ကို အသေးစိတ် မိတ်ဆက် ပြောကြားခဲ့သည်။ အများပြည်သူကိုယ်စားလှယ်များ၏ ဂရုပြုကြသော သဘောထားနှင့် တောင်းဆိုချက်များကို စီမံကိန်းတွင်ပါဝင်သူတို့က သေချာစွာနားထောင်ခဲ့ပြီး မေးခွန်းများကို ပြန်လည်ဖြေကြားခဲ့ကြောင်း သိရသည်။

ယခုအကြိမ် ကျင်းပပြုလုပ်သည့် အများပြည်သူနှင့်တွေ့ဆုံဆွေးနွေးပွဲတွင် သက်ဆိုင်သူဘက်ပေါင်းစုံ၏ အပြည့်အဝ အားပေးထောက်ခံမှုနှင့် တက်ကြွစွာ ပါဝင်မှုကို ရရှိခြင်းက ကျောက်ဖြူစီမံကိန်း၏ ပွင့်လင်းမြင်သာမှုနှင့် အများပြည်သူအပေါ် အလေးထားမှုကို ပေါ်လွင်စေသလို စီမံကိန်းအပေါ် လူထု၏ နားလည်ထောက်ခံမှုကို ထပ်ဆင့်တိုးစေခဲ့ကြောင်း သိရသည်။ (Xinhua)