အာဂျင်တီးနား နာမည်ကျော်စာရေးဆရာကြီး ဖုအော်ဟက်စစ်၏ တရုတ်နိုင်ငံအပေါ်ချစ်ခြင်းမေတ္တာ - မဟာတံတိုင်းဂရိတ်ဝေါ၏အုတ်တိုင်များကို ကျွန်တော်၏လက်ဖြင့် ထိတွေ့လိုပါသည်

“မဟာတံတိုင်းဂရိတ်ဝေါကို ကျွန်တော် ရောက်အောင်သွားမှာပါ။ ကျွန်တော် မျက်စိမမြင်သော်လည်း ခံစားနိုင်ပါတယ်။ ခမ်းနားတဲ့အုတ်တိုင်တွေကို ကျွန်တော့်လက်နဲ့ ထိတွေ့ကိုင်တွယ်ချင်ပါတယ်။” ၁၉၈၁ ခုနှစ် ဒီဇင်ဘာလတွင် အာဂျင်တီးနား နာမည်ကျော်စာရေးဆရာကြီး ဖုအော်ဟက်စစ်သည် တရုတ်နိုင်ငံသံတမန် ဟွမ်ကျီလျန်က သူ့အိမ်သို့ လာရောက်လည်ပတ်စဉ် ဤသို့ပြောဆိုခဲ့ခြင်းဖြစ်သည်။

ဤသို့မပြောဆိုမီ ရက်ပိုင်းက သူသည် ဒေသတွင်းသတင်းစာတစ်စောင်တွင် “ယွန်းလက်ကိုင်တုတ်ကောက်” အမည်ရှိ ကဗျာတစ်ပုဒ်ကို ရေးသားခဲ့သည်။ ထိုကဗျာတွင် သူ၏ တရုတ်နိုင်ငံအပေါ် ချစ်ခြင်းမေတ္တာကို ဖော်ပြခဲ့သည်။ ထိုအချိန်တွင် အသက်(၈၂)နှစ်ရှိ ဖုအော်ဟက်စစ်သည် မျက်စိကွယ်ခဲ့ပြီဖြစ်ရာ တရုတ်ယွန်းလက်ကိုင်တုတ်ကောက်တစ်ချောင်းနှင့် နောက်ဆုံးနှစ်များကို ကုန်ဆုံးခဲ့ရပါသည်။ ဖုအော်ဟက်စစ်သည် ၎င်းလက်ကိုင်တုတ်ကောက်နှင့်အတူ တရုတ်နိုင်ငံသို့ သွားရောက်လည်ပတ်လိုကြောင်း ကြိမ်ဖန်များစွာပြောဖူးသည်။

“ဖုအော်ဟက်စစ်ရဲ့ စာပေရေးသားမှုမှာ တရုတ်နိုင်ငံရိုးရာယဉ်ကျေးမှုရဲ့ လွှမ်းမိုးမှုများစွာရှိပါတယ်” ဟု အာဂျင်တီးနား Universidad Nacional de Mar del Plata သမိုင်းဘာသာပါမောက္ခ မေစိုက်တယ်စစ်. ကျူဖော်လေက ယခုရက်ပိုင်းတွင် ပြောဆိုခဲ့သည်။ ဖုအော်ဟက်စစ်၏ “လမ်းခွဲလမ်းကလေးကပန်းခြံ” ဝတ္ထုတိုတွင် တရုတ်နိုင်ငံအကြောင်းများ ရေးဖွဲ့ထားသည်။ ကျူဖော်လေ၏အမြင်အရ ဖုအော်ဟက်စစ်သည် တရုတ်နိုင်ငံ၏ နှစ်ပေါင်းထောင်ချီရှိသမိုင်းကို အထူးကြိုက်နှစ်သက်သည်။

ဖုအော်ဟက်စစ်သည် တရုတ်နိုင်ငံ၏ယဉ်ကျေးမှုကို အများသိအောင် မိတ်ဆက်ပေးခဲ့ပါသည်။ စပိန်ဘာသာဖြင့်ထုတ်ဝေသည့် “လျောက်ကျိုက်ပုံပြင်”၏ အယ်ဒီတာချုပ် တာဝန်ထမ်းဆောင်ခဲ့သည်။ ဒေသတွင်းမီဒီယာတွင် “ခန်းဆောင်နီအိပ်မက်”ကို “တရုတ်စာပေလောကတွင် နာမည်အကြီးဆုံးဝတ္ထု”ဟု ချီကျူးခဲ့သည်။ စပိန်ဘာသာ“ရီကျင်း(တရုတ်ရှေးဟောင်းဗေဒင်ကျမ်း)”စာအုပ်အတွက် နိဒါန်းပြုပေးခဲ့သည်။ “တရုတ်ေရှးဟောင်းကဗျာပေါင်းချုပ်ကြမ်း” စာအုပ်အတွင်းရှိ အချို့သော စာပေလက်ရာများကို စပိန်ဘာသာသို့ ဘာသာပြန်ဆိုခဲ့သည်။

ပြီးခဲ့သည့်(၁၉၈၀)ခုနှစ်များအတွင်း ဖုအော်ဟက်စစ်၏ဝတ္ထုတိုများကို တရုတ်ဘာသာသို့ ဘာသာပြန်ဆိုပြီး စာနယ်ဇင်းများတွင် ထုတ်ဝေခဲ့ပါသည်။ လက်ရှိတွင် ဖုအော်ဟက်စစ်၏လက်ရာများကို တရုတ်ဘာသာပြန်ဆိုထားသည့် စာအုပ်ပေါင်း (၈၀)ကျော်ရှိပြီဖြစ်ပါသည်။

မိမိကြိုက်နှစ်သက်သော ယွန်းလက်ကိုင်တုတ်ကောက်ဖြင့် ဂရိတ်ဝေါအုတ်တိုင်ကို ထိတွေ့ခွင့် မရခဲ့သော်လည်း တရုတ်နိုင်ငံယဉ်ကျေးမှုလွှမ်းမိုးမှုခံရသော ဖုအော်ဟက်စစ်သည် မိမိ၏ စာပေလက်ရာများဖြင့် တရုတ်နိုင်ငံစာရေးဆရာများနှင့် ဖတ်ရှုသူများကို ပြန်လည်အကျိုးသက်ရောက်မှုများ ရှိခဲ့ပါသည်။

(သတင်းရင်းမြစ်၊ ဆင်ဟွာကွန်ရက်၊ ဘာသာပြန်၊ Yunnan gateway)