ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်း အကောင်အထည်ဖော်ရာတွင် အရှိန်အဟုန်မြှင့်ဆောင်ရွက်မည်

ကျောက်ဖြူ ရေနက်ဆိပ်ကမ်း စီမံကိန်းကို အရှိန်အဟုန်မြှင့် အကောင် အထည်ဖော်မည် ဖြစ်ပြီး ကျောက်ဖြူအထူးစီးပွားရေးဇုန် ရေနက်ဆိပ်ကမ်း စီမံကိန်းနှင့် စပ်လျဉ်းသည့် နောက်ဆက်တွဲစာချုပ် (Addendum) ကို ဒီဇင်ဘာ ၂၆ ရက် ညနေပိုင်းတွင် နေပြည်တော်၌ မြန်မာနိုင်ငံနှင့် တရုတ်နိုင်ငံ တို့ဘက်မှ တာဝန်ရှိသူများက လက်မှတ်ရေးထိုးခဲ့ကြောင်း သိရသည်။

အဆိုပါ အခမ်းအနားတွင် နှစ်နိုင်ငံ တာဝန်ရှိသူများ တက်ရောက်ကြပြီး စီမံကိန်းကို အရှိန်အဟုန်မြှင့် အကောင်အထည်ဖော်ရန် အလေးပေး ပြောကြားခဲ့ကြောင်း သိရသည်။

စီမံကိန်းကို ထိထိရောက်ရောက် မြှင့်တင်နိုင်ရန် ကြိုးပမ်းရာတွင် နောက်ဆက်တွဲ သဘောတူညီချက်ကို တရားဝင် လက်မှတ်ရေးထိုးခြင်း မပြုမီ အကြိမ်ကြိမ် ညှိနှိုင်းမှုများ ပြုလုပ်ခဲ့ကြောင်း မြန်မာနိုင်ငံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ဒီဇင်ဘာ ၂၆ ရက်၌ သတင်းထုတ်ပြန်ခဲ့သည်။

လက်မှတ်ရေးထိုးပွဲ အခမ်းအနားတွင် ဒုတိယဝန်ကြီးချုပ်နှင့် ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးက “ကျောက်ဖြူ ရေနက်ဆိပ်ကမ်း စီမံကိန်းက မြန်မာ-တရုတ် နှစ်နိုင်ငံ ကုန်သွယ်မှုနဲ့ ကူးသန်းရောင်းဝယ်ရေး ပူးပေါင်းဆောင်ရွက်မှုကို အရှိန်အဟုန်မြှင့် ဆောင်ရွက်သွားမှာဖြစ်ပါတယ်” ဟု ပြောကြားခဲ့သည်။