မဟာဗျူဟာကျ၍ အပြန်အလှန်အကျိုးကျေးဇူးရှိသော တရုတ်-ဂျပန် ဆက်ဆံရေးကို ရှီနှင့် ခီရှီဒါ ထပ်လောင်းပြောကြား

တရုတ်နိုင်ငံ သမ္မတ ရှီကျင့်ဖိန်နှင့် ဂျပန်နိုင်ငံ ဝန်ကြီးချုပ် ဖူမီအို ခီရှီဒါတို့သည် နှစ်နိုင်ငံကြား မဟာဗျူဟာကျ၍ အပြန်အလှန် အကျိုးကျေးဇူးရှိသော ဆက်ဆံရေး ဘက်စုံအဆင့်မြင့်ရပ်တည်မှုကို ထပ်လောင်းပြောကြားခဲ့ကြသည်။

ယခုနှစ်သည် တရုတ်-ဂျပန် ငြိမ်းချမ်းရေး၊ ချစ်ကြည်ရေးနှင့် ပူးပေါင်းဆောင်ရွက်ရေး တရားဝင် ယေဘုယျလမ်းကြောင်း ထူထောင်နိုင်ခဲ့ပြီး နှစ်နိုင်ငံ ဆက်ဆံရေးသမိုင်းတွင် သမိုင်းမှတ်တိုင် တစ်ခုလည်း ဖြစ်လာခဲ့သော တရုတ်-ဂျပန် ငြိမ်းချမ်းရေးနှင့် ချစ်ကြည်ရေး သဘောတူစာချုပ် လက်မှတ်ရေးထိုးသည့် ၄၅ နှစ်မြောက် နှစ်ပတ်လည်ဖြစ်ကြောင်း ၃၀ ကြိမ်မြောက် အာရှ-ပစိဖိတ် စီးပွားရေးပူးပေါင်းဆောင်ရွက်မှု ခေါင်းဆောင်များအစည်းအဝေး၌ သီးခြားတွေ့ဆုံမှုအတွင်း သမ္မတ ရှီက ဂျပန်ဝန်ကြီးချုပ် ခီရှီဒါအား ပြောကြားခဲ့သည်။

လက်ရှိတွင် တရုတ်-ဂျပန် ဆက်ဆံရေးမှာ အရေးပါသောလမ်းဆုံတွင် ရောက်ရှိနေသည်ဟု ရှီက ဆိုသည်။ နှစ်နိုင်ငံအနေဖြင့် သမိုင်းမှသင်ခန်းစာယူလျက် တောက်ပသော အနာဂတ်ကိုဖန်တီးရန်၊ ခေတ်ကာလရေစီးကြောင်းကို လိုက်လျှောက်ရန်နှင့် မှန်ကန်သောလမ်းကြောင်းကို ထိန်းသိမ်းရန်၊ ၁၉၇၂ ခုနှစ်က သံတမန်ဆက်ဆံရေး ပုံမှန်ပြန်လည်ရောက်ရှိခဲ့ချိန်က မူလရည်မှန်းချက်အတိုင်း ဆက်လက်မှန်ကန်စွာ တည်ရှိရန် ရှီက ပြောခဲ့သည်။

သမိုင်းကြောင်း၊ ထိုင်ဝမ်နှင့် ဆက်စပ်သော အဓိကစည်းမျဉ်းကိစ္စရပ်များမှာ တရုတ်-ဂျပန် ဆက်ဆံရေး၏ နိုင်ငံရေးအုတ်မြစ်နှင့် သက်ဆိုင်ကြောင်း ရှီက အလေးထားပြောခဲ့သလို ဂျပန်နိုင်ငံအနေဖြင့် ၎င်းတို့၏ ကတိကဝတ်များကို လေးစားရန်နှင့် ပျက်စီး၍မရသလို လှုပ်ခတ်၍လည်းမရသော နှစ်နိုင်ငံ ဆက်ဆံရေးအုတ်မြစ်ကို သေချာခိုင်မာစေရန် တိုက်တွန်းခဲ့သည်။

ဂျပန်နိုင်ငံ ဝန်ကြီးချုပ် ခီရှီဒါကလည်း ဂျပန်နိုင်ငံအနေဖြင့် ငြိမ်းချမ်းစွာ ဖွံ့ဖြိုးတိုးတက်မှုလမ်းကြောင်းကို ဆက်လက်ကတိပြုမည်ဖြစ်ကြောင်း၊ ထိုင်ဝမ်အရေးနှင့်ပတ်သက်၍ ကိုင်တွယ်ရာတွင် ဂျပန်-တရုတ် ပူးတွဲကြေညာချက်၌ ဖော်ပြထားသည့်အတိုင်း ၎င်းတို့၏ ရပ်တည်ချက်ပြောင်းလဲခြင်းမရှိကြောင်း ပြောကြားခဲ့သည်။

ထို့နောက် နှစ်နိုင်ငံ ခေါင်းဆောင်များသည် အသစ်ထူထောင်ထားသော ပို့ကုန်ထိန်းချုပ်ရေးဆိုင်ရာ ဆွေးနွေးမှုယန္တရားကို ချီးကျူးခဲ့ကြသလို နယ်ပယ်စုံ ဆွေးနွေးမှုနှင့် ဆက်ဆံမှု ထိန်းသိမ်းရန်၊ တရုတ်-ဂျပန် အဆင့်မြင့် စီးပွားရေးဆွေးနွေးပွဲ၊ ပြည်သူအချင်းချင်း ကူးလူးဆက်ဆံမှုဆိုင်ရာ အဆင့်မြင့် ဆွေးနွေးညှိနှိုင်းမှုယန္တရားအစည်းအဝေးတို့ကို သင့်လျော်သောအချိန်တွင် ကျင်းပရန် သဘောတူခဲ့ကြသည်။

ဖူကူရှီးမားစွမ်းအင်စက်ရုံမှ နျူကလီးယားညစ်ညမ်းရေများ စွန့်ထုတ်ရေးကိစ္စဖြေရှင်းရေးအတွက် အပြုသဘောဆောင်သော သဘောထားဖြင့် ဆွေးနွေး ညှိနှိုင်းမှုများမှတစ်ဆင့် သင့်တင့်လျောက်ပတ်သော နည်းလမ်းကို ရှာဖွေရန်လည်း သဘောတူခဲ့ကြကြောင်း သိရသည်။ (Xinhua)