အေမရိကန္-မကၠဆီကို နယ္စပ္တြင္ ဒုကၡသည္အုံလိုက္က်င္းလိုက္ မ်ားျပားလာမႈေၾကာင့္ အေမရိကန္က ေ႐ႊ႕ေျပာင္းေနထိုင္သူမ်ားအား ေနရပ္ ျပန္လည္ပို႔ေဆာင္ရန္ အရွိန္ျမႇင့္တင္ေဆာင္႐ြက္လ်က္ရွိ

အမေရိကန်အစိုးရအနေဖြင့် အမိမြေလုံခြုံရေးတပ်ဖွဲ့ဝင် ၆၀၀ ကျော်ကို တက္ကဆပ်ပြည်နယ် အနောက်တောင်ပိုင်း Del Rioမြို့လေးသို့ စေလွှတ်ထားပြီးဖြစ်ရာ ယခုကာလများအတွင်း ယင်းဒေသ၌ စုပြုံနေသည့် တရားမဝင်ရွှေ့ပြောင်းနေထိုင်သူများအား နေရပ်ပြန်လည်ပို့ဆောင်ရန် အရှိန်မြှင့်တင်ဆောင်ရွက်သွားမည်ဖြစ်ကြောင်း အမေရိကန် အမိမြေလုံခြုံရေးဝန်ကြီး Alejandro Mayorkasက စက်တင်ဘာ ၂၀ ရက်တွင် ပြောကြားခဲ့သည်။

ရက်သတ္တပတ်အနည်းငယ်မှစ၍ တရားမဝင်ရွှေ့ပြောင်းနေထိုင်သူများက မက္ကဆီကိုနယ်စပ်ကို ဖြတ်ကျော်၍ Del Rioသို့ ဝင်ရောက်ခဲ့ရာ ယခုရက်ပိုင်းတွင် စံချိနန်တင်များပြားလာကြောင်း Alejandro Mayorkasက ယင်းနေ့ Del Rioတွင် မီဒီယာများအား ပြောကြားခဲ့သည်။ အမေရိကန်အစိုးရအနေဖြင့် ကိုဗစ်ကပ်ရောဂါနှင့် တရားမဝင်ရွှေ့ပြောင်းနေထိုင်သူများပြားခြင်း ဆိုးဝါးသည့် စိန်ခေါ်မှုများကို ရင်ဆိုင်နေရရာ ရောဂါကူးစက်ပြန့်ပွားမှုကို ကာကွယ်တားဆီးနိုင်ရေးအတွက် တရားမဝင်ရွှေ့ပြောင်းနေထိုင်သူများအား နေရပ်သို့ ဆက်တိုက် ပြန်လည်ပို့ဆောင်လျက်ရှိသည်။ စက်တင်ဘာ ၂၀ ရက်တွင် ရွှေ့ပြောင်းနေထိုင်သူ ၃,၀၀၀ ခန့်ကို Del Rioမှ အမေရိကန်ရှိ အခြားခိုလှုံရေးစခန်းများသို့ ပို့ဆောင်ရန် ခန့်မှန်းထားကြောင်း ဆိုသည်။

လက်ရှိ Del Rio အပြည်ပြည်ဆိုင်ရာ တံတားအောက် ယာယီစခန်းတွင် ခိုလှုံနေသည့် တရားမဝင်ရွှေ့ပြောင်းနေထိုင်သူ (၁၄၅,၀၀)ကျော် ရှိကြောင်း၊ ၎င်းတို့အနက် အများစုမှာ ဟေတီနိုင်ငံမှလာခြင်း ဖြစ်ကြောင်း USA Todayက စက်တင်ဘာ ၂၀ ရက်တွင် Del Rioမြို့ အုပ်ချုပ်ရေးအရာရှိတစ်ဦး၏ ပြောကြားချက်ကို ကိုးကားဖော်ပြထားသည်။ ယင်းဒေသတွင် ရာသီဥတုပူပြင်းခြင်း၊ ယာယီစခန်းတွင် နေထိုင်ရန်အခြေအနေ ဆိုးဝါးခြင်းနှင့် အမှိုက်သရိုက်များစုပြုံနေကာ အစာရေစာပံ့ပိုးမှု အလွန် အကန့်အသတ်ရှိနေကြောင်း သိရသည်။

Del Rioသို့ ဝင်ရောက်နေသည့် တရားမဝင်ရွှေ့ပြောင်းနေထိုင်သူ ၄၀၀ ကျော်ကို အမေရိကန်အစိုးရက စက်တင်ဘာ ၁၉ ရက်တွင် လေယာဉ်ခရီးစဉ် ၃ ခုဖြင့် ဟေတီနိုင်ငံ၏မြို့တော် ပို့တ်အော်ပရင့်စ်ကို ပြန်လည်ပိုဆောင်ပေးခဲ့ကြောင်း ၊ စက်တင်ဘာ ၂၁ ရက်တွင်လည်း တရားမဝင်ရွှေ့ပြောင်းနေထိုင်သူများ လိုက်ပါမည့် လေယာဉ်ခရီးစဉ် ၆ ခု ဟေတီကို ရောက်ရှိဖွယ်ရှိသည်ဟု ခန့်မှန်းရကြောင်း အမေရိကန်မီဒီယာများ၏ ဖော်ပြချက်များအရ သိရသည်။

Del Rioတွင် တရားမဝင်ရွှေ့ပြောင်းနေထိုင်သူ အဆမတန်များပြားလာခြင်းကြောင့် တက္ကဆပ်ပြည်နယ်ကို နိုင်ငံတော်အရေးပေါ်အခြေအနေကြေညာပေးရန်နှင့် ဖက်ဒရယ်အစိုးရမှ ပြည်နယ်သို့ ကူညီပံ့ပိုးမှုများပေးရန် ယင်းပြည်နယ် အုပ်ချုပ်ရေးမှူးGreg Abbottက သမ္မတ ဘိုင်ဒန်ကို စက်တင်ဘာ ၂၀ ရက်တွင် စာလွှာပေးပို့ပြီး တောင်းဆိုခဲ့သည်။ Greg Abbottသည် စက်တင်ဘာ ၁၆ ရက်တွင် တက္ကဆပ်ပြည်နယ်ရှိ အမေရိကန်-မက္ကဆီကို နယ်စပ်ဂိတ် ၆ ခုကို ပိတ်ထားရန် အမိန့်ချခဲ့ကြောင်း သိရသည်။

ယခုနှစ်မှစ၍ အမေရိကန်နှင့်မက္ကဆီကိုနယ်စပ်တွင် တရားမဝင်ရွှေ့ပြောင်းနေထိုင်သူများ အဆက်မပြတ်အရှိန်အဟုန်ဖြင့် တိုးပွားလာရာ ဘိုင်ဒန်အစိုးရအတွက် ကြီးမားသည့် စိန်ခေါ်မှုဖြစ်စေသည်။ ယခုနှစ်မှစ၍ အမေရိကန်-မက္ကဆီကို နယ်စပ်တွင် ဖမ်းဆီးခံရသည့် တရားမဝင်ရွှေ့ပြောင်းနေထိုင်သူ ဦးရေသည် နှစ်ပေါင်း(၂၀)ကျော်ကာလတွင် အများဆုံးဖြစ်ခဲ့ကြောင်း ၊ (၈)လကြာကာလတွင်ပင် ဖမ်းဆီးခံရသူ အကြိမ်ရေ (၂၀၈,၀၀၀)ကျော်ရှိရာ ၎င်းတို့အနက် အများစုသည် နေရပ်သို့ပြန်လည်ပို့ဆောင်ပြီးနောက် နောက်ထပ်တစ်ဖန် နယ်စပ်ဖြတ်ကျော်လာခြင်းဖြစ်ကြောင်း အမေရိကန်သတင်းမီဒီယာများ၏ ဖော်ပြချက်အရ သိရသည်။ (Xinhua)