နန္က်င္း လူအစုလိုက္အၿပဳံလိုက္ သတ္ျဖတ္ခံရမႈ ၂၀၂၁ ခုႏွစ္ ဝမ္းနည္းဖြယ္ ႏိုင္ငံေတာ္ အထိမ္းအမွတ္ အခမ္းအနား တ႐ုတ္ႏိုင္ငံ နန္က်င္းၿမိဳ႕တြင္ က်င္းပ

နန်ကျင်း လူအစုလိုက်အပြုံလိုက် သတ်ဖြတ်ခံရမှု ၂၀၂၁ ခုနှစ် ဝမ်းနည်းဖွယ် နိုင်ငံတော် အထိမ်းအမှတ် အခမ်းအနားကို တရုတ်နိုင်ငံ နန်ကျင်းမြို့၌ ဒီဇင်ဘာ ၁၃ ရက် နံနက်ပိုင်းတွင် ကျင်းပခဲ့ရာ တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်နှင့်နိုင်ငံတော်ကောင်စီ ဒုတိယဝန်ကြီးချုပ် စွန်းချွန်းလန်က တက်ရောက်၍ အမှာစကားပြောကြားခဲ့သည်။

အဆိုပါအခမ်းအနားကို နန်ကျင်း ဂျပန်ကျူးကျော်သူများ သတ်ဖြတ်ခံရမှု အောက်မေ့ဖွယ်အဆောက်အဦရှေ့ ရင်ပြင်တွင် ကျင်းပခဲ့ရာ နိုင်ငံတော်အလံကို တစ်ဝက်ချ၍ ဝမ်းနည်းအောက်မေ့မှုပြုခဲ့သလို နယ်ပယ်အသီးသီးက အဖြူရောင်ပန်းများတပ်ဆင်ထားသော လူပေါင်း ၃,၀၀၀ခန့်က ဆိတ်ငြိမ်စွာ မတ်တပ်ရပ်၍ လေးစားသမှုပြုခဲ့ကြသည်။

နန်ကျင်း ဝမ်းနည်းအောက်မေ့ဖွယ်အခမ်းအနားအား ၁၀ နာရီတိတိတွင် စတင်ကျင်းပခဲ့ရာ အခမ်းအနားတွင် တရုတ်ပြည်သူ့သမ္မတနိုင်ငံ နိုင်ငံတော် သီချင်း သီဆိုခြင်း၊ အသက်ဆုံးရှုံးခဲ့သူများအား ဆိတ်ငြိမ်စွာ အောက်မေ့ဝမ်းနည်းမှုကို ဖော်ပြခြင်း၊ နန်းကျင်းမြို့တွင် လေကြောင်းကာကွယ်ရေး အချက်‌ပေးဥဩဆွဲခြင်း၊ မော်တော်ယာဉ်များ ဟွန်းသံရှည်တီးခြင်း၊ သွားလာနေသူများ ရောက်နေရာတွင် ရပ်တန့်၍ဝမ်းနည်းကြောင်းဖော်ပြခြင်းများ ပြုလုပ်ခဲ့ကြကြောင်း သိရသည်။ ထို့နောက် တရုတ်ပြည်သူ့လွတ်မြောက်ရေးတပ်မတော်(PLA)က နိုင်ငံတော် ဝမ်းနည်းအောက်မေ့ဖွယ် သီချင်းအား တီးခတ်ပြီး တရုတ်ပြည်သူ့လွတ်မြောက်ရေးတပ်မတော် ဂုဏ်ပြုတပ်ဖွဲ့ တပ်ဖွဲ့ဝင် ၁၆ ဦးက လွမ်းသူပန်းခွေ ၈ ခုချ ခဲ့ကြောင်း သိရသည်။
အခမ်းအနားတွင် စွန်းချွန်းလန်က အမှာစကားပြောကြားခဲ့သည်။ နန်ကျင်း လူအစုလိုက်အပြုံလိုက် သတ်ဖြတ်ခံရမှုတွင် အသက်ဆုံးရှုံးခဲ့ရသူများအတွက် ဝမ်းနည်းကြောင်း နိုင်ငံတော် အထိမ်းအမှတ်အခမ်းအနားကို ယနေ့ ကြီးကျယ်ခမ်းနားစွာကျင်းပခြင်းသည် နန်ကျင်းတွင် အသက်ဆုံးရှုံးခဲ့သူများအား သတိရအောက်မေ့ခြင်း၊ ဂျပန်ကျူးကျော်သူများ၏ ရက်စက်စွာ သတ်ဖြတ်မှုခံရသည့် တစ်အူတုံဆင်း မွေးချင်းများအား ဝမ်းနည်းအောက်မေ့ခြင်း၊ ဂျပန်တော်လှန်ရေးစစ်ပွဲအောင်မြင်ရေးအတွက် အသက်ဆုံးရှုံးအနစ်နာခံခဲ့သည့် တော်လှန်ရေးသူရဲကောင်းများ အောက်မေ့သတိရခြင်းအား ဖော်ပြခြင်းဖြစ်သလို တရုတ်နိုင်ငံပြည်သူများက သမိုင်းသင်ခန်းစာယူ၍ အနာဂတ်တွင် တည်ငြိမ်လေးနက်မှုရှိသည့် ရပ်တည်ချက်ကို ဖန်တီးရန် ကြေညာခြင်း၊ ငြိမ်းချမ်းစွာ ဖွံ့ဖြိုးတိုးတက်ရေးလမ်းစဉ်အား မလွဲမသွေ ခိုင်မာစွာလျှောက်လှမ်းလိုသော ကြီးမားသည့် မျှော်လင့်ချက်ကို ဖော်ပြခြင်း ဖြစ်ကြောင်း ၎င်းက ပြောကြားခဲ့သည်။

စွန်းချွန်းလန်က ယခုနှစ်သည် တရုတ်ကွန်မြူနစ်ပါတီ တည်ထောင်သည့် နှစ် ၁၀၀ ပြည့် ဖြစ်ကြောင်း၊ နှစ် ၁၀၀ ကာလတွင် တရုတ်ကွန်မြူနစ်ပါတီသည် စည်းလုံးညီညွတ်စွာဖြင့် တရုတ်နိုင်ငံပြည်သူများအား ဦးဆောင်၍ စဉ်ဆက်မပြတ်ကြိုးပမ်းအားထုတ်ခဲ့ရာ ဘက်စုံ အတော်အသင့် ပြည်စုံကြွယ်ဝသည့် လူမှုအသိုက်အဝန်းတည်ဆောက်မှု ပထမ နှစ်တစ်ရာ ရည်မှန်းချက်အား သတ်မှတ်ကာလအတွင်း အကောင်အထည်ဖော်နိုင်ခဲ့ပြီး ဆိုရှယ်လစ် ခေတ်မီနိုင်ငံတော် ဘက်စုံတည်ဆောက်ရေး ခရီးစဉ်သစ်ကို စတင်လျှောက်လှမ်းနေပြီဖြစ်ကြောင်း၊ တရုတ်အမျိုးသားပြန်လည်ဖွံ့ဖြိုးတိုးတက်ရေးသည် ပြန်ပြောင်း၍မရသည့် သမိုင်းဖြစ်စဉ်သို့ လျှောက်လှမ်းလျက်ရှိရာ ခေတ်သစ်၊အခါသစ်တွင် အကျိုးဆောင်မှုအသစ်များကို ပြသလျက်ရှိပါကြောင်း၊ ၎င်းမှာ နန်ကျင်း လူအစုလိုက်အပြုံလိုက် သတ်ဖြတ်ခံရမှုအတွင်း အသက်ဆုံးရှုံးခဲ့သူများနှင့် တော်လှန်ရေးတိုက်ပွဲကာလအတွင်း ရဲဝံ့စွာ ပေးဆပ်ခဲ့သည့် သူရဲကောင်းများ၊ သေဆုံးသွားသည့် မွေးချင်းများအတွက် အကြီးမားဆုံး နှစ်သိမ့်မှုဖြစ်ပါကြောင်း ပြောကြားခဲ့သည်။ သမိုင်းသည် ရှေ့သို့ မပြတ် ရွှေ့လျားနေပြီး အမျိုးသားပြန်လည် ဖွံ့ဖြိုးတိုးတက်ရေး အလားအလာသည် ထွန်းလင်းတောက်ပလျက်ရှိရာ သမ္မတ ရှီကျင့်ဖိန် ဗဟိုပြုသည့် ပါတီဗဟိုကော်မတီတွင် မိမိတို့အနေဖြင့် ပို၍ နီးနီးကပ်ကပ် စည်းလုံးညီညွတ်စွာ နေထိုင်ကာ ပါတီ၏ နှစ်တစ်ရာ ကြီးမားသည့်အောင်မြင်မှုနှင့် သမိုင်းသင်ခန်းစာအား ဆတိုး တန်ဖိုးထားကြရမည်ဖြစ်ကြောင်း ပြောကြားခဲ့သည်။

အမှာစကားပြောကြားမှုအပြီးတွင် နန်ကျင်းမြို့လူငယ်ကိုယ်စားလှယ် ၈၄ ဦးက “ငြိမ်းချမ်းရေးကြေညာစာတမ်း”အား ဖတ်ကြားခဲ့ပြီး လူမှုအသိုက်အဝန်းအသီးသီးမှ ကိုယ်စားလှယ် ၆ ဦးက “ငြိမ်းချမ်းရေးခေါင်းလောင်း”တီးခဲ့ကြပြီး သေဆုံးသူများအပေါ် ဝမ်းနည်းပူဆွေးအောက်မေ့ခြင်းနှင့် ကမ္ဘာငြိမ်းချမ်းရေး အနာဂတ်အား မျှော်မှန်းခြင်း အနက်အဓိပ္ပါယ်အဖြစ် ခေါင်းလောင်းသံနှင့်အတူ ခိုငှက် ၃,၀၀၀ အား လွှတ်ပေးခဲ့ကြကြောင်း သိရသည်။

အဆိုပါ အောက်မေ့ခြင်းအထိမ်းအမှတ်အခမ်းအနားကို တရုတ်နိုင်ငံ အမျိုးသားပြည်သူ့ကွန်ဂရက် အမြဲတမ်းကော်မတီ ဒုတိယ ဥက္ကဋ္ဌ Ding Zhongliက အခမ်းအနားမှူးဖြစ်ဆောင်ရွက်ခဲ့ပြီး တရုတ်ပြည်သူ့ နိုင်ငံရေးဆွေးနွေးညှိနှိုင်းမှု ညီလာခံ ဒုတိယ ဥက္ကဋ္ဌ He Weiနှင့် ဗဟိုစစ်ကော်မရှင် အဖွဲ့ဝင်၊ စစ်ကော်မရှင် နိုင်ငံရေးလုပ်ငန်းဆိုင်ရာရုံး ညွှန်ကြားရေးမှူး Miao Hua တို့က တက်ရောက်ခဲ့ကြသည်။

ဂျပန်တော်လှန်ရေးစစ်ပွဲတွင် ပါဝင်ခဲ့ကြသည် စစ်သည်တော် ရဲဘော်များ၊ ဗဟိုပါတီ နိုင်ငံရေးစစ်ရေးဆိုင်ရာ ဌာနများနှင့် အရှေ့ပိုင်းစစ်ဆင်ရေး နယ်မြေ၊ ကျန်းဆူးပြည်နယ်၊ နန်ကျင်းမြို့ တာဝန်ရှိပုဂ္ဂိုလ်များ ၊ ဒီမိုကရက်တစ်ပါတီအသီးသီး၏ ဗဟိုအဖွဲ့၊ အမျိုးသား စက်မှုနှင့်ကုန်သည်လုပ်ငန်းဆက်သွယ်ရေးတာဝန်ခံ၊ နိုင်ငံရေးပါတီများမှမဟုတ်သော လူပုဂ္ဂိုလ်များ၊ နန်ကျင်း လူအစုလိုက်အပြုံလိုက် သတ်ဖြတ်ခံရမှု၌ ကံကောင်းထောက်မစွာ သက်ရှင်ကျန်ရစ်သူနှင့် သေဆုံးသူများ၏ မိသားစုဝင်ဆွေမျိုး ကိုယ်စားလှယ်များ၊ ပြည်တွင်း သက်ဆိုင်ရာ အထိမ်းအမှတ်ပြတိုက်များ လူပုဂ္ဂိုလ်များ၊သက်ဆိုင်ရာ အဆင့်မြင့်ပညာစာသင်ကျောင်းနှင့် ပညာရှင်၊ ဘာသာရေးနယ်ပယ်မှ ကိုယ်စားလှယ်များ၊ နန်ကျင်းအခြေစိုက် စစ်တပ်အရာရှိစစ်သည်ကိုယ်စားလှယ်များ၊ ကျန်းဆူးပြည်နယ် နယ်ပယ်အသီးသီးမှ လူထုကိုယ်စားလှယ်များကလည်း အခမ်းအနားသို့ ပါဝင်တက်ရောက်ခဲ့ကြကြောင်း သိရသည်။

ဒီဇင်ဘာ ၁၃ ရက်ကို နန်ကျင်း လူအစုလိုက်အပြုံလိုက် သတ်ဖြတ်ခံရမှု ဝမ်းနည်းဖွယ် နိုင်ငံတော် အထိမ်းအမှတ် အခမ်းအနားနေ့ အဖြစ် ၂၀၁၄ ခုနှစ် ဖေဖော်ဝါရီ ၂၇ ရက် ၁၂ ကြိမ်မြောက် အမျိုးသားပြည်သူ့ကွန်ဂရက် အမြဲတမ်းကော်မတီ သတ္တမအကြိမ်မြောက်အစည်းအဝေးတွင် ဥပဒေပြု သတ်မှတ်ခဲ့သည်။ (Xinhua)