တ႐ုတ္ႏိုင္ငံ ယူနန္ျပည္နယ္တြင္ ေတာဆင္႐ိုင္းေလးမ်ား စုၿပဳံေပါက္ဖြား

တောဆင်ရိုင်းမကြီးက မွေးကင်းစ ဆင်ပေါက်လေးကို ထိန်းကျောင်းရေကစားနေသည့် ဗွီဒီယို ယခုရက်ပိုင်းကာလ အွန်လိုင်းတွင် နာမည်ကြီးလာခဲ့သည်။ ယင်းဆင်ပေါက်လေးကို ယူနန်ပြည်နယ် ရှစ်ဆောင်ပဏ္ဏား တောဆင်ချိုင့်ဝှမ်းတွင် မွေးဖွားခြင်းဖြစ်ကြောင်း သက်ဆိုင်သူများက မိတ်ဆက်ပြောကြားခဲ့သည်။

တောဆင်ချိုင့်ဝှမ်း ဆင်အုပ် ၄ အုပ်တွင် ယခုကာလအတွင်း အသစ်မွေးဖွားသည့် ဆင်ပေါက်ကလေး ၆ ကောင် ရှိကြောင်း ၊၎င်းမှာ တောဆင်ရိုင်းကလေးများ စုပြုံပေါက်ဖွားသည့် အနေအထား ဖြစ်ရာ တရုတ်နိုင်ငံ၌ အကောင် ၃၀၀ ခန့်သာ ရှိသည့် အာရှဆင်ရိုင်းများ ကျန်းမာသန်စွမ်းမျိုးပွားမှုနှုန်း တိုးပွားလာသည့် အနေအထားဖြစ်ကြောင်း ဆိုသည်။

ဗီဒီယိုထဲတွင် တောဆင်ရိုင်းများအား ကျန်းမာရေးစောင့်ရှောက်ပေးသည့် ဆရာဝန် ပေါင်မင်ဝေက ဆင်ပေါက်လေးမှာ “ရှောင်ချွဲအော် ဆင်အုပ်ကြီး”မှ ဖြစ်ကြောင်း ဆိုသည်။ ယင်းဆင်အုပ်သည် ၂၀၂၁ ခုနှစ် နိုဝင်ဘာလက တောဆင်ချိုင့်ဝှမ်းသို့ ဝင်ရောက်လာခြင်းဖြစ်ပြီး ဗွီဒီယို ရိုက်ကူးသည့်အချိန်က ၂၀၂၁ ခုနှစ် ဒီဇင်ဘာ ၇ ရက်က ဖြစ်ကြောင်းနှင့် ထိုစဉ်က ယင်းဆင်ပေါက်လေးသည် ၃ ရက်သားသာ ရှိသေးကြောင်း ဆိုသည်။

နှစ်စဉ် ဇန်နဝါရီမှ ဧပြီလ အချိန်သည် တောဆင်ချိုင့်ဝှမ်းကို တောဆင်ရိုင်းများ ဝင်ထွက်သွားလာသည့် အများဆုံးကာလဖြစ်သလို အာရှဆင်ရိုင်းပေါက်ဖွားသည့် အများဆုံးကာလဖြစ်ကြောင်း ပေါင်မင်ဝေက ပြောသည်။ ယခုတွေ့ရှိရသလောက် ဆင်ပေါက်လေး ၆ ကောင်က ရှောင်ချွဲအော်၊ တာ့ချွဲအော်၊ ယန်ယန် နှင့် တာ့လူပေါင်း ဆင်အုပ်ကြီးလေးအုပ်က ဖြစ်ပြီး ဆင်ကလေးအားလုံး ကျန်းမာကြကြောင်း၊ ယင်းဆင်အုပ်ကြီး ၄ အုပ်သည် ယခုကာလ တောဆင်ချိုင့်ဝှမ်းကို အဝင်အထွက်အများဆုံး မိသားစုများဖြစ်ပြီး ချိုင်ဝှမ်းမှာ အချိန်အတိုင်းအတာ တစ်ခုအထိ ရပ်နားနေထိုင်ကြအုန်းမည်ဟု ခန့်မှန်းရကြောင်း ဆိုသည်။

တောဆင်ချိုင့်ဝှမ်းတွင် သွားလာလှုပ်ရှားနေသည်က အဆိုပါ တောဆင်ရိုင်းမိသားစုများသာ မဟုတ်ကြောင်း၊ ယခု ၂နှစ်ကြာကာလတွင် လေ့လာသူဝန်ထမ်းများ၏ စောင့်ကြည့်မှုမှတ်တမ်းများအရ တစ်ကောင်တည်သွားလာသည့် တောဆင်များပင် အကောင် ၁၀၀ ခန့် ရှိကြောင်း သိရသည်။ တောဆင်ချိုင့်ဝှမ်းတည်ရှိသည့် ရှစ်ဆောင်ပဏ္ဏား အမျိုးသားအဆင့် သဘာဝပတ်ဝန်းကျင် ထိန်းသိမ်းရေးဒေသ မုန့်ယန်ကျစ်ဧရိယာရှိ အာရှဆင်ရိုင်း အရေအတွက်ကလည်း တည်ငြိမ်စွာတိုးတက်လျက်ရှိသည်။

အာရှဆင်ရိုင်းများသည် တရုတ်နိုင်ငံတွင် အဓိကအားဖြင့် ယူနန်ပြည်နယ် ရှစ်ဆောင်ပဏ္ဏား၊ ဖူအော်၊ လျင်ချန်းစသည့် ပြည်နယ်ခွဲ၊မြို့များတွင် ဖြန့်ကျက်နေထိုင်ကြကြောင်း၊ ကယ်ဆယ်ထိန်းသိမ်းမှုများကို နှစ်ပေါင်း ၃၀ ကျော် ကြိုးပမ်းလုပ်ဆောင်ခဲ့ပြီးနောက် ဆင်ရိုင်းအကောင်ရေ ၃၀၀ ခန့်ထိ ပြန်လည်တိုးပွားလာခဲ့သည်။ (Xinhua)