တ႐ုတ္ႏိုင္ငံက ေမာင္းသူမဲ့ ေမာ္ေတာ္ကားကုမၸဏီက အငွားယာဥ္ဝန္ေဆာင္မႈ လိုင္စင္ရရွိ

တရုတ်နိုင်ငံ မြို့တော် ပေကျင်းရှိ Yizhuang တွင် မောင်းသူမဲ့မော်တော်ယာဉ်တစ်စင်း (ယာဘက် ပထမ) စမ်းသပ်ပြေးဆွဲနေသည်ကို ၂၀၂၁ ခုနှစ် အောက်တိုဘာ ၁၉ ရက်က တွေ့ရစဉ် (ဆင်ဟွာ)

တရုတ်နိုင်ငံ ကွမ်ကျိုးမြို့ရှိ မောင်းသူမဲ့မော်တော်ကား ကနဦးဖော်ဆောင်ခဲ့သော Pony.ai ကုမ္ပဏီသည် တရုတ်နိုင်ငံ၌ ယင်းမော်တော်ယာဉ်အမျိုးအစားဖြင့် အငှားယာဉ် လိုင်စင်ရရှိသော ပထမဆုံးကုမ္ပဏီဖြစ်လာကြောင်း သိရသည်။
အဆိုပါ လိုင်စင်ဖြင့် မေလမှစတင်၍ နန်ရှားခရိုင်ရှိ စတုရန်းကီလိုမီတာ ၈၀၀ ကျော်ရှိသော ဧရိယာတွင် အလိုအလျောက်မောင်းနှင်နိုင်သော မော်တော်ယာဉ် အစီးရေ ၁၀၀ ပြေးဆွဲရေး ခွင့်ပြုသွားမည်ဖြစ်ကြောင်း ကုမ္ပဏီက ဆိုသည်။

ထို့ပြင် လာမည့်နှစ်တွင် တရုတ်နိုင်ငံရှိ နောက်ထပ်မြို့ကြီးနှစ်မြို့တွင် အလားတူဝန်ဆောင်မှုများ စတင်နိုင်ရန် စီစဉ်ထားကြောင်း သိရသည်။

၂၀၂၁ ခုနှစ် နှစ်ကုန်ပိုင်းတွင် ပေကျင်းမြို့၌ မောင်းသူမဲ့ မော်တော်ယာဉ်များ စီးပွားဖြစ်ပြေးဆွဲမှုများ စတင်ရန် ခွင့်ပြုချက်ရရှိခဲ့သည်။ တရုတ်နည်းပညာကုမ္ပဏီကြီးဖြစ်သော Baidu နှင့်အတူ Pony.ai ကုမ္ပဏီသည် ယင်းသို့ ရှေ့ပြေးဝန်ဆောင်မှုများ စတင်ရန် နိုင်ငံတစ်ဝန်းခွင့်ပြုချက်ရရှိထားသော ပထမဆုံးကုမ္ပဏီများအနက် တစ်ခု ဖြစ်သည်။ (Xinhua)