တရုတ်နိုင်ငံ ရှေးဟောင်းမြို့တော် ရှီးအန်း၏ ယဉ်ကျေးမှု အထင်ကရ ။ ။ တာ့ယန့်စေတီ

တရုတ်နိုင်ငံ ရှီးအန်းမြို့သည် မြို့တည်သက်တမ်း နှစ်ပေါင်း ၃,၁၀၀ ကျော် သမိုင်းရာဇဝင် ရှိသလို မြို့တော်အဖြစ် တည်ထားသောသက်တမ်း နှစ်ပေါင်း ၁,၁၀၀ ကျော် ရာဇဝင်ရှိသည့် သမိုင်းယဉ်ကျေးမှုဆိုင်ရာ အထင်ကရ မြို့ဖြစ်သည်။ ယင်းနေရာတွင် တရုတ်ရှေးမင်းဆက်ပေါင်း ၁၃ ဆက်၏ ပျော်ရွှင်မှု၊ ဝမ်းနည်းမှု၊ ဆုံစည်းမှု၊ ခွဲခွါမှု အဖြစ်အပျက် များစွာ ဖြစ်ပွားခဲ့သည်။ ရှီးအန်းမြို့ရှိ ယဉ်ကျေးမှုအထင်ကရနေရာ တစ်ခုစီတိုင်းတွင် ရှည်လျားသော သမိုင်းကာလ၏ ခမ်းနားထည်ဝါမှုနှင့် တသွင်သွင် ပြောင်းလဲလာသည့် သမိုင်းအသွင်အပြင်ကို မှတ်သားထားသည်။

ရှီးအန်း ယဉ်ကျေးမှု အထင်ကရနေရာတစ်ခုဖြစ်သည့် တာ့ယန့်စေတီကို ထန်မင်းဆက်၊ ထန်ကောင်းကျုံးလက်ထက် တတိယနှစ်( အေဒီ ၆၅၂ ခုနှစ်)တွင် စတင် တည်ဆောက်ခဲ့ပြီး ခေတ်အဆက်ဆက်က ပြုပြင်မွမ်းမံထိန်းသိမ်းလာခဲ့ရာ လက်ရှိ စေတီကို မင်မင်းဆက်က ပြန်လည်ပြုပြင်ခဲ့ခြင်း ဖြစ်သည်။ တာ့ယန့်စေတီကို လေးထောင့်သဏ္ဍာန် စေတီအုတ်မြစ်ပေါ်တွင် စတုရန်းသဏ္ဍာန် အုတ်စေတီ ခုနစ်ဆင့် တင်၍ တည်ဆောက်ထားခြင်းဖြစ်ပြီး အမြင့် ၆၄.၁ မီတာ ရှိသည်။ ထန်မင်းဆက်၌ တည်ရှိခဲ့သော လေးထောင့်အဆောက်အဦသဏ္ဍာန် အုတ်စေတီများအနက် လက်ရှိတွင် သမိုင်းကာလအစောဆုံးနှင့် ထုထည် အကြီးမားဆုံးဖြစ်သော ယင်းစေတီသည် အိန္ဒိယ ဗုဒ္ဓဘာသာ အဆောက်အဦပုံစံဖြင့် တရုတ်နိုင်ငံသို့ ရောက်ရှိလာပြီး တရုတ်အသွင်ပြောင်းလဲမှု၏ ကိုယ်စားပြုရုပ်ဝတ္တုသက်သေတစ်ခုဖြစ်ပြီး ဗုဒ္ဓဘာသာ သာသနာ ပြန့်ပွားမှုသမိုင်းတွင် အရေးကြီးသောနေရာအစိတ်အပိုင်း ဖြစ်ခြင်းကြောင့် ၂၀၁၄ ခုနှစ်တွင် ကမ္ဘာ့ယဉ်ကျေးမှုအမွေအနှစ်စာရင်းတွင် ထည့်သွင်းခဲ့သည်။ (Xinhua)